Scialdi plu che n juech
Cie y chi ie pa la lia Trix? Na ciaculeda cun l presidënt

Cun Bruno Delucca ons rujenà dl’identità dla lia, de si atività, di ubietifs y di proiec per l daunì.

Cie ie pa la Lia Trix?
Lia Trix ie na lia per i juesc da mëisa. Cie uel pa chël dì? Mutons, mutans, jëuni, jëunes y jënt plu plu de tëmp che se anconta per fé d’uni sort de juesc. La lia ie unida metuda su tl 2004 da n valgun apasciunei de juesc. I prim ani ans laurà cun l VKE de Bulsan, y an purtà per l prim iede truep juesc y urganisà i prim dis de juesc te scola elementera a Urtijëi.
Tl 2006 ie la grupa deventeda na lia. L ie unii cumprà juesc y cun l sustëni dla Nëus Jëuni Gherdëina ans giapà nce na luegia per tenì i juesc y nce una ulà pudëi jughé. Da iló inant ans scumencià cun i Trix Days, for te scola elementera.
Ntan l ann se ancutoven te valeda: te biblioteches, te calonia, tl Circolo, y l univa fat nce ativiteies alalergia. I Trix Days, d’autonn, fova zënzauter l majer avenimënt che la lia ova te si program. Uni ann fovel n’autra tematica y l univa for nvià d’autra lies a fé pea, coche la Lia dal Scioh de Gherdëina o nce d’autra lies da oradecà.

Chi ie pa i cumëmbri y la cumëmbres dla Lia Trix?
Jënt d’uni età, jëuna y manco jëuna. A duc ti sal bel a fé’ vel juech. N ne se tol nia plu tan dl’aurela de jì nzaul y truepa jënt jughea nce a cësa per si cont. Chël ie ënghe n merit dla lia.

Ciun gran proiec à pa abù la lia nchin śën?
Cun la pandemia ne n’iel nia plu stat mesun fé i Trix Days per n valgun ani. Daldò fova la lia mpue jita de reviers n con’ de nteres, ajache la jënt ne pudova nia plu s’ancunté giut alalongia. Truepa jënt ova lascià de jughé ncantëur, la jugova plutosc a cësa.
Da n valgun ani incà ie la lia Trix inò scialdi ativa y cëla de pité sëires per granc y grandes y domesdis per mutons y mutans, sibe per la scola elementera che per la mesana. Per mëter a jì inò i Trix Days ne n’iela mo nia tan inant, ma l ie for l’idea de i urganisé. Audëi sce tl daunì iesen inò boni d’la mëter a jì.
Chëst ann de merz à la lia Trix fat pea pra l turnoi a livel provinziel dl juech “Die Siedler von Catan”, metù a jì dala lia Dinx. A Urtijëi iel unì urganisà na sort de fasa danora dl turnoi. La finela, per chëla che l se à cualificà trëi jugadëures de Gherdëina, ie stata pona n’ena do a Persenon n ucajion dla manifestazion DinxCon.
Da no desmincë ne n’ie sambën la sëira de PubQuiz che ie unida fata ti ani, y che à for purtà n gran nteres. L à da nfé puech cun i juesc da mëisa ma mpo fajovel a na maniera de purté jënt ntëur na mëisa. Vel’ pub quiz uniral nce fat tl daunì, ma nce te chësc cajo cun n’autra maniera de ti jì permez - povester per la Nëus Jëuni Gherdëina o dedicà al’autra lies dla valeda.
N gran proiet ie nce chël dula ludoteca: tres l portal online dla lia Trix possen ti cialé a duc i juesc che n à. La lia mprësta juesc y n ti cunsieia nce gën velch ala families.

Ciun proiec iel pa per l daunì?
Con la bona cunlaurazion che la lia Trix à cun la lia Dinx de Bulsan, vëniel urganisà truep deberieda. L turnoi de Catan unirà fat inant nce l ann che vën, y pona iel nce mo d’autri turnoies pra chëi che ulessan fé pea. Y coche dit, fé inò i Trix Days ie ënghe tl program, ma nia plu coche l fova ntlëuta.
N generel lëura la lia al mumënt per tré su cumëmbri y cumëmbres nueves, per slargë ora l’atività.

Ciun valores dl juech uel pa la lia dé inant?
Sté deberieda n cumpanìa per fé n juech, mpede ste a cësa da sëui. N’auternativa al mond digitel di fonins y n nseniamënt soziel. Mparé n juech, jughé deberieda cun d’autra persones, che possa vester cumpanies, zachei de familia o nce jënt che n ne cunësc nia. Jughé per se devertì o nce fé juesc cumpetitifs per na ndesfideda persunela.

Ciun rodul ratëis’a che ebe la lia te y per Gherdëina?
Ulessan che l fossa n pont fis tla cultura dla valeda. Ntlëuta fova i Trix Days n pont cunesciù, śën laurons sun na pruposta plu regulera per ti unì ancontra ala jënt che uel se tripé cun i juesc da mëisa.
La lia Trix lëura gën cun la Nëus Jëuni Gherdëina, cun chëla che fajon truep juesc y ti purton ai mutons y ala mutans nuviteies y nteres per chësc bel hobby.

[Bruno Maruca]