La turnadëcia de Gherdëina à si daunì
Damian Piazza de Urtijëi, belau dejeset ani, à abinà si pascion tl mond dl turné

Pernanche é scumencià a rujené cun Damian, éi bele riesc pudù sentì che l se à tëut pea n’aria de ntujiasm y pascion. L ti luna pu i uedli canche l conta de coche l à scumencià, de coche l à mparà a lauré cun la turnadëcia, de coche l possa jì a se crì ora l leniam y de coche l sta pona plu y plu ëura alalongia a crië si lëures. Nsciuma, n vëija, n aud y n sënt che l ti sà propi n bel mat.

Damian, da ulà es’a giapà ca chësta pascion per la turnadëcia?
Dut à scumencià da n mi cumpani, Isaak Demetz, che ie n ann plu vedl che ie. Ël à n iede udù Urban Piazza, l jurman de mi pere, che turnova a Santa Cristina, sun marcià di paures y di artejans. Da iló incà àl pona giapà l nteres y la ueia de purvé a turné. Nscila se àl dan n cin’ ani pastelnà na turnadëcia y à scumencià. Ël me cuntova for de coche l laurova y de tan bel che l ti savova, y nsci éi nce ie ulù purvé.

Co es’a pona scumencià?
Dan trëi ani y mez, da Nadel, me à mi berba scincà na tunadëcia de mitel che ël nstës à metù adum. Te si tëmp liede féjel d’uni sort de roba, l pastelnea mpue dl dut. Y nsci éi pudù scumencé a lauré. Ma danz che la ne n’ie nia bele snel jita tan bën....

Co pa nscila?
Al scumenciamënt fovi mpue puech mutivà. Ne fove nia drë’ bon. I lëures ne univa nia ora coche ie i ulove. Y nscila éi danz lascià la turnadëcia fërma nchin d’auril dl ann do, nchin da Pasca.

Co es’a pona inò abinà la mutivazion?
Da Pasca éi pona dit a mé nstës: “Śën uei fé zeche. Scenó ie la turnadëcia che me é tan mbincià mé fërma cajù te garage.” Y nsci éi inò scumencià, turnan vel’ piculëza me éi riesc rendù cont che la jiva bele scialdi miec che no dant. Da iló inant éi pona scumencià a turné uni di, cun gran mutivazion. Do scola jivi bele snel te garage a turné. Ne jive pu belau nianca plu su a cësa a maië da cëina, y daduman levovi for mes’ëura dant per fé i duvieres che ne n’ove nia fat l di dant (rij, ndr.). Ie l fajove for mé per mé, uni di, coche hobby.

Y da ulà es’a mparà a turné?
É mparà da sëul, cun vel’ liber, vel’ video sun YouTube. Sambën me à nce judà mi pere. Ël me à judà a capì cie che ie l lën y coche n lëura limpea.
N con’ dl ziplé sons l ann passà d’instà nce stat laora da Aron Demetz a Puntives trëi enes alalongia, y dant da Stefan Perathoner de Caio. Ëi me à nsenià truep. Chësc feji per mé, per mparé. L me sà bel y nteressant, y dantaldut nce mpurtant per mé sce ue svilupé mi cunescënzes y cumpetënzes.

Te es dit che te tornes te garage. Es’a iló na sort de berstot?
Sci. Cun mi pere ons tëut la dezijion che ie torne te garage, ulache on fat ora na pitla sort de berstot. Mi pere zipla, ma da d’ël te berstot ne possi nia turné, ajache turnan féjen danz truepa fuera y n grumon de stuep.

Dal hobby iela pona cun l tëmp unida mpue plu mpeniativa, no pa?
Sci, ngali à ujins y cumpanies de mi genitores udù che l ie n tel jëunn che torna. Nscila me damandovi sce ne pudësse pa nia ti fé vel’ piculëza. Ie torne dantaldut scudeles, russes, pitli bossli. Nscila éi pudù scumencé a davanië vel’ scioldo cun mi pascion.
Cun chësc var inant me à mi pere mpermetù che l me ëssa dat n contribut per na turnadëcia nueva, sce l ëssa vendù zeche pra l’Unika. Y nsci iela pona nce jita.

Ie pa l turné per té persunalmënter plu na esprescion artistica o à pa ti lëures plu na finalità de funzionalità? Nsciuma, tornes’a tu na scudela plu ajache te ues che n la tole ca coche na scudela o che n ti cële coche opra artistica?
Turné possa dessegur ti dé lerch a tramedoi cosses. Canche n turnova propi truep te Gherdëina, zacan, pona fova dut belau mé funziunel. Ma cun l tëmp se à chësc sambën svilupà y velch se à mudà. Śën iel sambën nce truep lëures che à “mé” na funzion artistica. N valguni damanda propi che ti feje na scudela per la tenì sun mëisa, per ti cialé, zënza che n mëte ite versura o pan per ejëmpel. Chësc se muda per mé da lëur a lëur, y leprò nce la maniera de lauré.

Stlujon via cun l’ultima tematica y la gran dumanda mpue pruvucatoria: iel pa da té ora mo n daunì per la tradizion dl turné te Gherdëina?
Mi cumpani Isaak Demetz y ie son śën i plu jëuni che torna te Gherdëina. Pona cunësci mo Samuel Bergmesiter, che à 25 ani. Son danz puec de scialdi jëuni. Ma canche vëije de tei pitli mutons che vën a cialé coche torne, pona vëiji che l ti sà bel a cialé pro, che l ie na puscibltà che nce ëi giape la pascion. Chël àuden y vëijen for gën. Da dì iel nce che turné ne n’ie pu nia massa rie, do che n proa mpue y n à la ueia de mparé.
La cialova bën ora stleta... L turné fova pu belau mort ora, pudëssen dì, ora che vel’ un che torna bele da for incà. Ma śën che l ie inò vel’ scialdi jëunn, à da mé ora l turné te Gherdëina bën mo n bon daunì.

[Bruno Maruca)