Na usc sun sëida
Na ciaculeda cun la ciantarina Carmen Insam dla band Sun|sëida

Carmen, posses’a te prejenté n curt, prëibel?
Bon di a duc, ie son Carmen Insam, y te chësta intervista ei l unëur de pudëi me prejenté coche la ciantarina de la band Sun|sëida.S on chersciuda su te Gherdëina y l me à for bele sapù drët bel a cianté. Mi gran sëmi fova bele for chël de ruvé su sun plach y pudëi cianté y fé mujiga deberieda cun d’autri. Da pitla sons datrai jita pea cun mi pere y mi oma a cianté y nce a cësa univel bele for fat mujiga. L me sà for tan bel canche duta la familia cianta deberieda sun festes, coche da Nadel o da n cumplì di ani. Canche mi sor ova scumencià da pitla a jì ala scola de mujiga per mparé la chitara, me ovel drët apasciunà, dantaldut me savovel tan bel ajache suné la chiatara se lascia tan bën cumbiné cun la usc. Nscì me ei lascià nsenië n doi acorc y dopro ne n’ei nia plu lascià do de me goder la mujiga. Canche Martin Demetz me ova fat la pruposta de mëter su na band deberieda, fovel per mé mé una na drëta resposta.

Cie ie pa Sun|sëida?
Sun|sëida ie na rockband che se à metù adum dan zirca doi ani. L ie da dì che nëus ne se cunescian mo nia duc dan fé mujiga deberieda y canche l fova da crì ora n inuem per la band, ans tl cë i ciantons defrënc da chëi che union. Uniun di cumëmbri de chësta band à si persunalità desfrënta che fej nce ora la band. N possa se nmaginé persunaliteies defsrëntes che se à abinà sun chësta sëida, ulache i se vën ancontra y se anconta per fé chël che i lieia: la mujiga. Coche l toca pra na band, ons sambën n baterist dut da gara, Pauli Moroder, n pianist che porta ite si creiatività, che ie Ujep Runggaldier, on Gabriel Demetz ala chitara a lectrisc che sona i plu biei soli y Martin Demetz à mparà ite l bas per ti dé l drë’ fonz a duta la cianties.

Co iel pa a scrì cianties y les cianté per ladin? Ce raport es’a tu cun chësta rujeneda?
Nchinamò ons scrit una na ciantia per ladin y l semea che la ti sebe nce bela ala jënta. La ciantia à inuem “Eremita” y trata de un che viv da sëul danter la montes y se god a vester da sëul tla natura cun puech y nia, ntan che la jënt ie for che lëura y pënsa al davani. Chi che ne la cunësc nia, possa gën jì a s’la scuté su sun Spotify o YouTube. A scrì na ciantia coche chësta per ladin, che ie mi rujeneda dl’oma, dà na sudesfazion y me fej nce sentì plu familiera. L ladin ie perdrët na bela rujeneda fina cun chëla che l se lascia nce lauré bën tla mujiga. Speron che sonse boni de prejenté nce zeche de nuef tl daunì, cialé cie che porta l tëmp.

Ce mujiga ve sàl pa bel a suné?
L ie bel a lauré te cianties, l ie bel a mustré cie che n ie boni de fé y l ie bel a purté dant la mujiga che ne ie nia da uni di. N vëija che nce a duc i cumëmbri ti sàl bel a pudëi purté ite si stil, si criatività y si sentimënc; chësc nes sà scialdi mpurtant. Dl stil ons n gran focus sun l rock, on vel’ ciantia di ani 80/90, ma nce de bands atueles, di Maneskin o di Pinguini Tattici Nucleari, ma nce vel’ auter genre nes dà nteressea y purvon for a abiné cianties che nes fej plajëi y che va bën per duc i strumënc y per la usc.

Y per finé via, na dumanda nia massa desfrënta permez ala segonda de chësta ntervista, ma mpo mpue zeche d’auter: cie ulëssa pa comuniché Sun|sëida?
Vester te na band ie na gran fertuna, ma nia ne vën dal nia y n mpera a tenì adum. Chësc ulessans nëus ënghe dé inant tres nosta mujiga. Unfat chi, can, co o ulà: l mpurtant ie che fé mujiga feje legrëza, porte adum jënt y feje devertì.

[Bruno Maruca]