Gran festa per i 101 ani dla Lia Mostra d’Ert
Per l’ucajion iel stat trëi dis rics de manifestazions tl scumenciamënt de setëmber

L ann passà à la Lia Mostra d’Ert - Circolo festejà si centené: n secul de storia fat de essënza artistica. Danz che per gauja dla restrizions anti-Covid-19 ne n’iela nia jita fata a mëter a jì na majera festa per uneré tla miëura maniera i cënt ani dla lia. Chëst ann àn recuperà y metù a jì na lingia de manifestazions de trëi dis n ucajion di 101 ani.

Placac y lecorc
Danter la truepa atività che l ie unì fat, iel stat da udëi la mostra di placac. Tlo se àn cruzià de abiné adum na gran cumpëida de placac dla mostres che lia à metù a jì te chisc ani. Plu o manco 400 placac iesen stai boni de recuperé, danter chël che n ova te archif, cun l aiut nce de ex cumëmbri y cumëmbres dla lia che à mo ulù tenì vel’ lecort pra sé. Na culezion de lecorc che dà nce da ntënder la mpurtanza y valuta dl’atività fata dala nasciuda dla lia incà.

Daunì, robot y ert
L prim di doi referac ie stat cun l storich y critich d’ert Andrea Baffoni, che ie danter l auter curadëur dl’Idea Unika y dl’Unika nce chëst ann. Baffoni à n iede rujenà dla parola “robot” o “robotich”, che ie unida “nventeda” propi tl medemo ann de nasciuda dla Lia Mostra d’Ert, tl 1920. La parola vën dal cech “robota”, che uel dì “lëur pesoch”. Da chël mumënt inant iel de cunseguënza sambën nce stat la prejënza de chësta parola tl mond artistich, per jì a ntënder miec chësta mascins che ie tlo per fé zeche per nëus, per nes judé tl lëur.
L cunzet y l’idea che la persona à dl robot se à sambën mudà ntan dut l secul, pervia dl gran svilup ndustriel, tecnich y tecnologich che l’umanità à abù ultimamënter. Ma robot ne n’ie sambën nia mé passà, ma dantaldut prejënt y daunì. Nsci che ruveron n di o l auter nce sun Mars, ulache “ne saron pa nia i prims, ajache i roboc ie pu bele iló,” da coche à auzà ora Andrea Baffoni.

Architetura cuntemporana a Viena
L segondo referat à udù la partezipazion de Matthias Moroder de Uritjëi y Jerome Becker dl Luxemburg, che à na sala de esposizion de architetura cuntemporana a Viena. Pra l referat ài rujenà de coche i lëura cun mostres de studi de architetura “jëuni”, che ne n’à mo nia l gran inuem. Chësc per pité na vedrina y n mesun nce de descuscion n con’ de tematiches d’uni sort che à da nfé cun l’architetura: danter chëla soziela y ecologica nchin a chëla feminista y ai problems cun la digitalisazion.
Te duta Europa iel mé mo doi d’autri studi che lëura de chësc viers. La finalità ie chëla de purvé ora ideies y ti dé l mesun de mëter ora y de sperimenté a chiche ne l giapëssa scenó nia.

“Lijënda dl’uriginn dla Lia Mostra d’Ert - Circolo”
Pra la prima performance àn batù ora da n tòch de peton n logo dla Lia Mostra d’Ert, dan la sala sun Pitla Plaza de Sant Antone. Da coche conta l presidënt Mirko Insam, à chësta danter l auter nce ulù vester na critica de viers dl sëurafrabicamënt te Gherdëina, pra chël che l vën pensà do massa puech a dut chël che chësc cumporta. L cunliamënt dla performance cun la nasciuda dla lia ie chël de na posizion de contra, de fé pensé do te na maniera critica, che ie pu una dla finaliteies prinzipeles y de mpurtanza dl’ert n generel. Da coche spiega l presidënt Insam, ne n’ie la lia segurdenó nasciuda mé per chësta rejon, ma l se trata de na maniera auternativa nteressanta de percie che la ëssa pudù nascer.

Rujené zënza rujené y suné danter la jënt
La segonda performance ie stata de Thomas Sterna, che se à mustrà te na sort de scatula de scipa tla sala dla mostres dla lia. L artist à rujenà achiet, cun daujin na nterpreta che à comunicà cun l lingaz di sënies. Na maniera auternativa de comunicazion cun l publich, che se à udù prutagunist de na nterpretazion y decudificazion ativa, nia “mé” passiva. La terza performance ie stata de Julia Liedel, che se à dant muet sun fonz y à dessenià cun crëida tla sala dla mostres dla Lia Mostra d’Ert, per jì pona ora dedora y suné la vidula danter la jënt, per finé vis inò tla sala cun n synthesizer tacà ite tla vidula y da dedò mudan ju si usc a na maniera che la sunëssa grotesca y “scura”.

Mujiga: l’ert per la urëdles
Daujin a duta chësta manifestazions, cun leprò nce la prejentazions di libri “100 ani Circolo” “Sté ert” y di lëures dl Simposium sa mont dl 2020, y nce a cursc per mutons y mutans cun lëures de stampa 3D y cun linoleum, iel sambën nce stat na gran lerch dedicheda ala mujiga. Per finé via la maratona de trëi dis n ucajion di 101 ani dla lia, iel sun Pitla Plaza de Sant Antone stat l mesun de scuté su la mujiga dal vif de Marion Moroder, Stefan Demetz y Ivan Schenk y di Pëufla, cun da dedò na sëira tla sala dla mostres dedicheda ala mujiga eletronica. “Scenó ne vën la festes de mujiga techno nia fates propi tl publich, nsci ie chësta stata na bela ucajion per mustré che nce chësta ie ert y cultura,” nscila l presidënt Mirko Insam.

[Bruno Maruca]